Test en Portugal ante profesionais antes da Volta a Galicia
Por Redacción
O Grupo Deportivo Supermercados Froiz participa sábado e domingo no Grande Premio do Dao, en Portugal, unha cita na que calibrará o seu estado de forma antes do principal obxectivo da tempada, a Volta a Galicia.
Serán dúas etapas, de 146 e 131 quilómetros, nas que os corredores do equipo pontevedrés competirán xunto a ciclistas profesionais.
Á cita o Froiz acode cun equipo formado por Pedro Merino, Alejandro Lomba, Rubén García, Miguel Gómez, Antonio Portela, José Luis Mariño e Roberto Mediero.
VOLTA GALICIA
Tras esta carreira a escuadra dirixida por Evaristo Portela afrontará a Volta Galicia, unha rolda de tres etapas que foi presentada este mércores en Ourense.
A primeira xornada celebrarase con saída e chegada en Lugo, a segunda entre Egos e Manzaneda, en Ourense, e a terceira en Pontevedra, cun percorrido de 148 quilómetros e tres altos de montaña: Lobeira, O Busto e A Escusa.
A Volta Galicia disputarase do 18 ao 20 de setembro coa presenza de 18 equipos, entre eles os sete galegos (Froiz, Aluminios Cortizo, Speed Road, Caeiro, Rías Baixas, Autronic e Concello do Porriño) ou o último en anotarse, o Lokomotiv ruso.