A 52 Regata Rías de Galicia deixa o seu selo en Sanxenxo
Por Redacción
A frota da 52 edición da Regata Rías de Galicia, antiga Regata Rías Baixas, deixouse notar durante dous días en Sanxenxo.
No Porto Deportivo Juan Carlos I finalizou este xoves a primeira etapa, entre Vigo e Sanxenxo, na que as embarcacións desafiaron a chuvia.
Os vencedores desta primeira etapa foron "Aceites Abril" (irmáns Pérez Canal, Real Club Náutico de Vigo) na clase 1, o "Solventis (Malalo Bermúdez de Castro, MRCY Baiona) na clase 2, "Bunda" (Jacobo Solorzano, RCN A Coruña) na 3, "Balea Dous" (Luis Pérez, CN Rodeira) na 4, "Sebrala Dos" na Open (Maxín Froiz, RCN Sanxenxo), "Namasté" (Luis de Mira, MRCY Baiona) en J80 e o F18 "Vertixe Sailing" de Alfonso Crespo e David Fontán.
Os participantes, que deron ambiente a unha gris xornada en Sanxenxo, abandonaron ás 13:00 horas deste venres o porto para completar a segunda etapa, que lles leva ata A Pobra do Caramiñal.
Esta competición está organizada polo Real Club Náutico de Vigo.