Diego Romero logra praza para o Mundial de Milán coa vista posta nos Xogos Olímpicos
Por Redacción
Os Xogos Olímpicos de Río 2016 están un pouco máis preto para Diego Romero, despois de que o padexeiro do Breogán do Grove lograse a última praza dispoñible no equipou nacional de canoa para o Campionato do Mundo de Piragüismo en Augas Tranquilas que se celebra o próximo mes de agosto en Milán.
En Italia repartiranse a maior parte de prazas dispoñibles para os Xogos, de aí a importancia de lograr o billete mundialista no último control selectivo na modalidade de C-1 1.000 metros, celebrado este domingo no encoro pontevedrés de Pontillón do Castro.
Alí o deportista vilagarcián impúxose nunha disputada regata, na que tivo que remontar nos metros finais para finalizar, cun tempo de 4:16.520 por diante do cesureño André Oliveia (4:16.840).
O resto de participantes non contaron con opcións de triunfo, sendo terceiro Brais Casas (Kayak Tudense), cuarto Sergio Vallejo (Piragüismo Poio) e quinto José Luis Bouza (Kayak Tudense).
Agora Diego Romero intentará pelexar por finalizar en Milán entre os seis primeiros, o que significaría a súa clasificación para Río 2016, o principal obxectivo do padexeiro do Breogán, que ademais tamén participará no C-2 1.000 xunto ao seu compañeiro de equipo Tono Campos co mesmo obxectivo de conseguir o pasaporte olímpico.
Relacionadas:
-
O soño olímpico do piragüismo pontevedrés, en xogo no Mundial de Milán
Por Diego Espiño |
-
Chuvia de medallas para os padexeiros pontevedreses no Nacional de piragüismo na pista de Verducido
Por Redacción |
-
Tono Campos e Diego Romero, ao Mundial de Milán tras gañar o selectivo de Verducido
Por Redacción |