Pablo Moreno suma puntos no ranking para Río tras un bo Mundial de esgrima
Por Redacción
Ata Moscú desprazouse nos últimos días Pablo Moreno, tirador da Escola Hungaresa de Pontevedra para participar no Campionato do Mundo de esgrima que se celebrou na capital rusa dende o pasado 13 de xullo. Tratábase dunha cita importante para el, xa os puntos que se repartían neste torneo servían para o ranking FIE, que dará acceso aos Xogos Olímpicos de Río 2016.
Pablo Moreno participou como membro do equipo nacional absoluto de sabre masculino neste Mundial, proba na que competiu ininterrompidamente dende o ano 2009.
A proba de sabre masculino estaba conformada por 150 tiradores dos equipos nacionais de 52 países. Moreno logrou pasar a fase de grupos inicial con tres vitorias e tres derrotas, clasificándose en 82ª posición para o taboleiro de 128 tiradores, onde se enfrontou ao bielorruso Valery Pryiemka, número 50 do ranking FIE, vencendo por 15 toucados a 12, nun asalto moi pelexado no que Pablo Moreno soubo impoñer a súa esgrima ao bielorruso.
Esta vitoria deulle acceso directo á segunda xornada, entre os 64 mellores do mundo. Pablo Moreno perdeu no seu seguinte asalto por 15 toucados a 13 contra o romanés Tiberiu Dolniceanu, número 4 do ranking FIE e ao cabo gañador da medalla de bronce neste Campionato do Mundo.
O asalto transcorreu moi igualado, decantándose nos últimos toucados a favor do romanés debido en boa medida á arbitraxe, que beneficiou en todo momento coas súas decisións ao tirador a priori máis forte.
A pesar de non poder acceder ao taboleiro dos 32 mellores do mundo, o resultado de Pablo Moreno é moi positivo, finalizando en 61ª posición e sumando uns valiosos puntos para escalar postos no ranking FIE.
Ademais, como membro do equipo nacional absoluto, Pablo Moreno participou tamén na proba por equipos, onde o combinado español, no posto 13 do ranking FIE, superou o taboleiro de 32 equipos gañando a Kazakstán por 45 toucados a 37.
No taboleiro de 16 equipos España enfrontouse a Rusia, país que gañara a xornada anterior o Campionato do Mundo en sabre masculino individual, co seu tirador Alexei Yakimenko. España perdeu por 45 toucados a 36 e quedou relegada a disputar os asaltos polos postos 9 ao 16. Ocupou finalmente a décimo cuarta praza, tras caer contra Ucraína por 45 toucados a 41, gañar a Gran Bretaña por 45 a 39 e perder fronte a Canadá por 45 a 41.