Recepción municipal aos medallistas pontevedreses no Nacional de piragüismo en pista
Por Redacción
Os padexeiros pontevedreses foron grandes protagonistas do Campionato de España de piragüismo en pista que se celebrou a pasada fin de semana nas instalacións do Pontillón do Castro (Verducido).
Os deportistas do Club Naval e da Escola de Piragüismo Cidade de Pontevedra colgáronse numerosas medallas nas respectivas probas nas que participaron, tanto en embarcación individual como compartida.
Todos eles foron recibidos este venres polo alcalde de Pontevedra, Miguel Anxo Fernández Lores, e a concelleira de Deportes, Anxos Riveiro.
Ambos os dous felicitaron a todos os medallistas polos éxitos alcanzados nestes campionatos e comprometéronse a colaborar con eles na medida do posible.
Ademais dos respectivos adestradores, por parte do Club Naval de Pontevedra acudiron ás instalacións de Michelena 30 Carla Sieiro (seis medallas), Adrián García (dúas medallas) e Breogán Monteagudo -en representación do seu irmán Iago (tres medallas)-; mentres que polo Cidade de Pontevedra foron Jenifer Casal (dúas medallas) e Raquel Rodríguez, Isabel Nova, Noelia Rodríguez, Alexandre Castro e Iván Villanueva cunha cada unha.
Francisco Javier Casal, adestrador do Club Naval, manifestou ao remate do encontro que están "moi satisfeitos" co rendemento dos seus deportistas, sobre todo polo nivel "bastante alto" que ten este tipo de campionatos. O próximo reto será o Mundial de Portugal no que participará Iago Monteagudo e o Europeo de Romanía de setembro, ao que acudirán Iago e Carla Sieiro.