O Waterpolo Galaico Pontevedra, a facer un bo papel no Campionato de España cadete
Por Redacción
O Club WaterPolo Galaico Pontevedra participará no Campionato de España cadete de waterpolo que se disputa do mércores 15 ao domingo 19 de xullo no polideportivo municipal de Nazaret (Valencia).
Cun novo formato no que participan 20 equipos, o campionato unirá nunha mesma sede e de forma continua, a fase previa e fase final, de forma que na fase previa participan 12 equipos, repartidos en 4 grupos de 3 cunha liguilla interna. De aquí, os dous primeiros de cada grupo pasarán a oitavos de final, medíndose os 8 equipos que a tempada pasada quedaron entre os 8 primeiros. Os terceiros de grupo xogarán entre si polas prazas 17 a 20.
Os pontevedreses xogarán no grupo A fronte ao CW Navarra (mércores 17:30 horas) e ao Stadium Casablanca de Zaragoza (xoves 9:00 horas), co obxectivo de clasificarse para oitavos de final, onde os seus rivais poden ser o Real Canoe madrileño quedando segundo de grupo (xoves 14:00 horas) ou o CW Sevilla sendo primeiro de grupo (xoves 21:00 horas). En caso de non conseguir o obxectivo, sendo terceiros de grupo o rival do venres sería o terceiro do grupo D (Mataró, Majadahonda ou Xerez).
O campionato finaliza o domingo ás 18:00 horas e conta coa organización do CW Turia.
Os cadetes do CW Galaico Pontevedra clasificáronse para este campionato tras gañar a liga galega con pleno de vitorias, redondeando a tempada co campionato e subcampionato no Campionato Galego Cadete no que participaron con dous equipos.
O CW Galaico Pontevedra espera facer un bo papel, pois conta cun grupo experimentado que xa participou en varios campionatos nacionais dende categoría alevín. Sete dos 13 convocados veñen de participar no Campionato de España Xuvenil de waterpolo disputado en Las Palmas a pasada fin de semana.
Pablo Sueiro, Juanjo Roca, Iago Facal, Pedro Fentanes, Luis Mosquera, Artai Poses, Rodrigo Sobral, Aarón Tellería, Rubén Rodríguez, Germán Amoedo, Jacobo Baltasar, Pablo Teijeira e Xian Barros serán os xogadores que representen o CW Galaico Pontevedra xunto con Javi de Sáa e Kike García.