Poio Pescamar e Leis Pontevedra xa teñen rivais para a próxima tempada
Por Redacción
A Federación Española de Fútbol desvelou a composición dos catro grupos que terá a próxima tempada a Segunda División de fútbol sala feminino.
De novo, o Leis Pontevedra volverá estar encadrado no grupo IV xunto co outro equipo galego da categoría, o Viaxes Amarelle.
Ademais, terán como rivais a sete equipos madrileños: Simancas, Alcorcón B, At. Madrid Navalcarnero B, Leganés, Souto do Real, Humanes Basket e FS Femenino San Fernando. O grupo completarano o Casar de Cáceres estremeño, o Unami castelán-leonés e tres equipos de Castela La Mancha, Amora, Alovera e Chiloeches.
En total, o grupo IV da Segunda División contará con catorce equipos.
O obxectivo do Leis Pontevedra será, ao igual que a pasada tempada, manterse un ano máis na categoría e consolidarse na división de prata do fútbol sala.
Para iso non contará con David Muñoz, o seu técnico a pasada tempada, que pasou a formar parte do cadro técnico do equipo masculino. O seu posto será ocupado por Edu Fernández, ex xogador do Leis e do Rías Baixas.
SEN SORPRESAS EN PRIMEIRA DIVISION
Pola súa banda, a Federación de Fútbol confirmou tamén aos rivais do Poio Pescamar de cara á próxima tempada. En Primeira División non haberá sorpresas e as únicas novidades serán os ascensos do Elche, o Valdetires Ferrol e o Rubí catalán.
Os dezaseis equipos da categoría complétanse, ademais do Poio, con Cidade das Burgas, Ourense e Burela (Galicia), Orvina (Navarra), Rioja (La Rioja), Roldán (Murcia), Majadahonda, Alcorcón, Móstoles e At. Madrid Navalcarnero (Madrid), Universidad de Alicante (Comunidade Valenciana) e Gironella (Cataluña).