Lourdes Domínguez, eliminada na fase previa de Wimbledon
Por Redacción
Chegaba Lourdes Domínguez en boa forma ao terceiro Grand Slam do ano, Wimbledon, tras impoñerse no torneo ITF de Montepellier, pero a pontevedresa non puido confirmar os pronósticos que lle situaban como principal cabeza de serie da fase previa no aberto británico.
Lourdes despediuse das pistas do All England Club na segunda rolda da clasificación ao perder en dous sets ante a luxemburguesa Mandy Minella (7-6 e 6-2).
A tenista galega, que eliminara en primeira rolda da previa á rumana Ana Bogdan (7-5 e 6-3), acusou o desgaste dun primeiro set que se decidiu na morte súbita.
Minella, engañoso número 205 do ranking WTA a tenor da súa traxectoria, fixo valer a súa maior fortaleza ao servizo para sentenciar o partido.
Lourdes regresara esta semana ao Top-100, concretamente ao posto 90 do ranking das mellores raquetas mundiais.