Lúa Piñeiro cae ante a francesa Haby Niare nos cuartos de final dos Xogos Europeos de Bakú
Por Redacción
Ata os cuartos de final. Así foi a aventura da galega Lúa Piñeiro nos Xogos Europeos que se están a disputar na cidade de Bakú (Acerbaixán). Caeu contra a francesa Niare Haby por un resultado final de 4-8.
Foi unha dura competición para a de Caldas na categoría de -67 quilogramos, porque tiña por diante un cadro moi duro.
Na primeira rolda enfrontouse á suiza Nina Klaey, campioa de Europa 2014 e bronce mundialista no 2013. Pero Lúa fixo un magnífico combate e, cun primeiro asalto espectacular (2-5), deixou moi tocada á súa rival. No resto do combate, Lúa controlou perfectamente e así, chegou ao final do terceiro asalto cun 5-7 ao seu favor.
Pero o segundo paso foi igual ou máis duro. Piñeiro tiña enfronte á francesa Niare Haby, tamén cun currículo espectacular: ouro no Mundial de Puebla 2013 e prata no europeo de 2013 e 2014.
Aínda así, a taekwondista galega saíu ao tapiz sen complexos e deu a cara principalmente nos dous primeiros asaltos. Perdeu o primeiro pola mínima (1-0) e empatou o segundo (4-4), pero no terceiro, tiña que arriscar para poder superar á francesa, e así chegaron máis puntos para Haby. Ao final, 4-8 para a francesa, un resultado que a deixou fóra da loita polas medallas.