Obxectivo alcanzado para o Arxil no Nacional Infantil ao avanzar ata os oitavos de final
Por Redacción
Estase a mostrar como unha das revelacións do campionato, evidenciando a súa mellor versión co apoio da bancada pontevedresa.
O Club Baloncesto Arxil goza da organización do Campionato de España Infantil Feminino e faino co seu equipo clasificado para os oitavos de final, obxectivoque se formulaban ao inicio da competición aínda que acudían á cita sen presión.
Tras o triunfo contundente da primeira xornada ante o La Salle Melilla, as pontevedresas selaron o seu pase ás eliminatorias gañando de xeito máis sufrido ao Cabaña Buenavista (57-55) no seu segundo encontro.
Cos deberes feito só faltaba coñecer en que posición pasaba aos cruzamentos, que será finalmente a segunda tras encaixar na xornada final da fase de grupos a súa única derrota, ante o Uni Girona (57-65) nun choque que malia todo deixou boas sensacións no club verde, dada a calidade do rival.
Agora as xogadoras adestradas por Marita Janeiro avanzan ata os oitavos de final, onde non queren descartar nada ante o La Salle Tenerife, rival este mesmo mércores do Arxil ás 19:00 horas no Centro Galego de Tecnificación Deportiva.
A competición entra pois na súa fase decisiva concentrando os partidos en dúas das súas tres sedes, o propio CGTD e o Pavillón Municipal dos Deportes de Pontevedra.