O Portonovo cae en Noia na promoción de terceiros (4-2) e o seu ascenso depende dun milagre
Por Redacción
Un milagre necesita o Portonovo para xogar a próxima tempada en Terceira División, despois de caer derrotado na volta da promoción de terceiros clasificados da Rexional Preferente.
Os arlequinados acudían a Noia coa intención de remontar o 2-2 da pasada semana en Baltar, pero encontrouse unha dura derrota que non reflicte a igualdade da eliminatoria (4-2).
Nun choque con moitos nervios a primeira metade transcorreu cunha grande igualdade pero contou cunha acción decisiva, a expulsión de Diego aos 25 minutos.
Non foi ata o segundo acto cando un tanto en propia porta de Marcos Dopazo aos 59 minutos puxo o choque de cara aos locais.
Malia o golpe o Portonovo non se rendeu e conseguiu igualar catro minutos despois de penalti transformado por Víctor.
A eliminatoria non se decidiu ata o cuarto de hora final cos goles de Alberto Rial e Alcalde para o Noia. Nacho recortou distancias dando algunha esperanza aos arlequinados, pero de novo Alberto Rial sentenciou.
Con esta derrota, a única opción de ascenso para o Portonovo pasa pola actuación dos dous equipos galegos que seguen loitando no play-off de ascenso a Segunda B, Pontevedra e Deportivo B. Os de Luis Oliveira necesitan que ambos os dous consigan subir de categoría para xogar o próximo ano en Terceira.
CF NOIA (4): Óscar Toledo, Juanjo, Rego (Canabal, min.57), Moreiras, Villaverde, Hugo García (Alcalde, min.74), Alves, David Suárez (Alberto Rial, min.67), Manuel Queiruga, Juan Queiruga, Borja Collar.
PORTONOVO SD (2): Iván Parada, Agra, Gándara, Iván Renda, Suso Bea (Marcos Dopazo, min.32), Brian, Álex Cubas (Marcos Blanco, min.67), Diego, Víctor, Nacho, Luis Alberto (Manu Sieiro, min.41).
Árbitro: Hernández González. Amoestou a Rego e Héctor Antelo no Noia e a Víctor, Iván Renda e Agra no Portonovo, onde tamén expulsou a Diego por dobre amarelo (min.25).
Goles: 1-0 Marcos Dopazo en p.p. (min.59), 1-1 Víctor de penalti (min.63), 2-1 Alberto Rial (min.77), 3-1 Alcalde (min.85), 3-2 Nacho (min.86), 4-2 Alberto Rial (min.89).
Incidencias: Partido disputado no campo San Lázaro de Noia.