A Arousa F-7 presenta a súa edición máis internacional
Por Redacción
O Pazo de Rubiáns, en Vilagarcía, acolleu este xoves a presentación da vixésima Arousa F-7, cuxa fase final se disputará entre os días 15 e 17 de maio no estadio da Lomba.
Será ademais a edición máis internacional da xa clásica competición alevín, coa presenza de equipos de sete nacionalidades.
A fase final contará coa participación de 20 clubs, entre os que se encontran algunhas das mellores canteiras do panorama futbolístico mundial.
Así pelexarán polo título Barcelona, Real Madrid, Atlético de Madrid, Athletic Club, Benfica, Porto, Inter, Ajax, Valencia, Sevilla, Villarreal, Celta, Deportivo, o Chivas Guadalajara mexicano, o Toronto FC canadense e o Kashiwa Reysol xaponés.
A eles únenselles para completar o cartel os catro equipos procedentes de fase previa: Lanzarote, Oroso, Calasanz e Ural.
A presentación do evento contou coa presenza do padriño da presente edición, o porteiro do Celta Sergio Álvarez, ademais de diversas autoridades como o alcalde de Vilagarcía, Tomás Fole, o presidente da Federación Galega de Fútbol, Rafael Louzán, e o Secretario Xeral para o Deporte, José Ramón Lete.