O TM Monte Porreiro feminino afástase do play-off e o masculino achégase á permanencia
Por Redacción
Cara e cruz para os equipos do Tenis de Mesa Monte Porreiro na xornada celebrada no pavillón da Cidade Infantil Príncipe Felipe.
O equipo feminino recibiu o Vasa Arroyo de Valladolid coa baixa de Ana Pérez. Na súa substitución compareceu a xogadora infantil Noelia Santiago, ademais das habituais Elísabet e Victoria Cadilla.
A baixa fíxose notar e as pontevedresas perderon por un contundente 0-6 na que é a súa segunda derrota consecutiva, que as afasta dos postos de play-off de ascenso á Superdivisión feminina, agora a catro puntos aínda que cun partido menos que as súas rivais.
Pola súa banda o equipo masculino enfrontouse ao Son Cladera de Mallorca, logrando un importante triunfo por 4-2.
Daniel Conic, Nacho Fernández e Santi Prieto formaron polos pontevedreses, que se achegan a falta de seis xornadas, á salvación.
O Monte Porreiro masculino conta cunha vantaxe de seis puntos sobre a zona de descenso, que marca o seu rival no último encontro.