As nadadoras do Galaico proclámanse subcampioas de España de longa distancia
Por Redacción
A localidade catalá de Sabadell acolleu esta fin de semana a sexta edición do Campionato de España de natación de longa distancia, unha proba na que os deportistas do Club Natación Galaico lograron grandes resultados. Especialmente o equipo feminino que, grazas ás súas boas marcas, se proclamaron subcampionas nacionais.
Águeda Cons foi, de todas as nadadoras do Galaico, a única que logrou subir ao podio. Fíxoo tras finalizar terceira na proba de 3.000 metros na categoría infantil, cun tempo de 35:54.48. Quedou a tan só 36 segundos da gañadora, Marian Castro (CN Sabadell).
Na mesma proba, Lara Gómez Cortés foi sétima cun tempo de 37:56.31.
Ademais, a participación feminina do Galaico contou tamén cun bo sétimo posto de Paula Goyanes nos 5.000 metros júniors. Completou a súa carreira en 1:01:45.01.
Con estes resultados, o Galaico sumou un total de 32 puntos, o que lles permitiu colgarse a medalla de prata. As campioas de España foron as nadadoras do CN Sabadell, que acumularon 46 puntos. O seu triunfo chegou tras unha fabulosa actuación nas probas sénior, onde o equipo pontevedrés non contaba con representantes.
Pola súa banda, o equipo masculino finalizou en undécima posición con 14 puntos. Os seus mellores resultados foron a sétima praza de Cristian Fernández nos 5.000 metros sénior cun tempo de 57:48.76 e o undécimo posto de Daniel Sánchez nos 5.000 metros júniors, proba que finalizou en 58:41.63.