A Asociación Juan XXIII promove o deporte inclusivo cun torneo de fútbol sala
Por Redacción
Fomentar o deporte inclusivo en Galicia é o principal obxectivo da xornada que organizará a Asociación Juan XXIII de Pontevedra no Pavillón Municipal o vindeiro martes día 18 de decembro.
Desde as 10:30 da mañá e por espazo de tres horas desenvolverase o acto "Promovendo o deporte inclusivo. II torneo de fútbol sala", que ademais servirá de homenaxe ao usuario da Asociación Gonzalo Losada Castro, gran deportista e afeccionado ao deporte pontevedrés falecido o pasado mes de marzo.
A organización espera a presenza do triatleta Javier Gómez Noya, ademais de xogadores de Pontevedra, Leis e Teucro que formarán equipo cos usuarios do Club Polideportivo Juan XXIII.
Para a ocasión contarase coa colaboración de árbitros federados de fútbol sala e do xornalista de PontevedraViva, Ramiro Espiño, que exercerá de presentador do acto.