Diego Crespo proclámase campión galego sub-19 de squash
Por Redacción
O deportista marinense do Squash Pontevedra Diego Crespo é o novo campión galego sub-19 tras impoñerse no campionato celebrado a pasada fin de semana nos baixos do estadio de Balaídos, en Vigo.
O xogador, de só 16 anos, chegou ata a semifinal sen ceder un set e na penúltima rolda, ante o santiagués Aron Astray, comezou con forza para situarse dúas mangas arriba (11-6 e 11-8). Astray reaccionou para empatar o partido pero Diego mostrouse máis forte no set definitivo.
Na final esperábao Cío García, do Vigo Squash, que eliminara na outra semifinal ao pontevedrés Jorge González.
No encontro definitivo o xogador do Squash Pontevedra empregouse a fondo e, sen apenas erros, dobregou o seu rival en catro mangas (11-6, 8-11, 11-9 e 11-7).
Jorge González foi finalmente quinto, mesma posición que Sabela Rebollo, que completou a presenza do club lerezano.