Galicia xuvenil colga o bronce no Campionato de España con cinco teucristas nas súas filas
Por Redacción
Cinco xogadores teucristas colgáronse o bronce no Campionato de España de Seleccións Autonómicas disputado estes días na localidade castellonenca de Oropesa do Mar.
Héctor Gil, Felipe Lorenzo, Aser Costal, Sergio Altirriba e José Luis Arosa formaron parte do equipo xuvenil masculino que representou a Galicia na competición.
Tras realizar unha positiva primeira fase ante Castela-León, Castela A Mancha e Andalucía, o combinado galego dirixido por Luis Montes, Adrián Méndez e Manuel Montes dobregou a Navarra nos cuartos de final (30-26).
En semifinais chegou a derrota ante a gran favorita, Cataluña (40-31), nun partido no que foi por detrás no marcador dende o inicio.
Obrigado a xogar polo terceiro posto, o combinado galego impúxose este mércores a Madrid (40-33) tras un choque igualado na primeira metade e que se decidiu pola boa defensa de Galicia no segundo período.
Os xogadores adestrados por Luis Montes dedicaron a medalla ao seu compañeiro Miguel Casal, que se perdeu a cita por motivos de saúde.
No resto de categorías destacaron o título logrado pola selección galega infantil feminina e o bronce do equipo cadete feminino.