A defensa, principal preocupación de Luisito ante o Cerceda
Por Diego Espiño
A escaseza de efectivos na liña defensiva converteuse na principal preocupación de Luisito para afrontar o domingo a volta da competición ligueira ante un rival de peso como o Cerceda.
A saída de David Feito unida á baixa por acumulación de amoestacións de Anxo deixa os granates con só catro defensas dispoñibles no primeiro equipo.
O técnico do equipo lerezano debátese estes días entre "saír cunha defensa de tres ou poñer un lateral esquerdo que sería Campillo ou Adrián Gómez", segundo el mesmo recoñece.
A outra alternativa, utilizar ao xuvenil Iago, está case descartada para o preparador granate, que defende que "mentres poida tirar do que teño no primeiro equipo non vou perxudicar ao filial nin ao xuvenil de división de honra porque o que queremos é que se salven".
A parte desta cuestión Luisito traballa en neutralizar o potencial do Cerceda "de medio campo para adiante, onde teñen futbolistas dun nivel moi alto para esta categoría".
PENDENTE DAS INCORPORACIÿNS
O corpo técnico espera que antes do peche do mercado chegue algún reforzo para un plantel que "cada vez estase a quedar máis curto", recoñece o adestrador granate.
A intención é fortalecer defensa e centro do campo, pero polo momento a boa noticia neste aspecto é o estado de Fran Fandiño, un futbolista que "vai a ser importante" segundo Luisito e que apura as súas últimas semanas de recuperación.