O Deportivo B presenta a súa candidatura superando ao Arosa (1-2) na Lomba
Por Redacción
Cambio de papeis. A vitoria do Deportivo B na Lomba mete aos herculinos no pelotón de cabeza, tras unha serie de catro triunfos consecutivos que lle serven para confirmar a súa candidatura ao título, mentres que supón un freo para o Arosa, que cede terreo e abandona os postos de play-off.
Mentres os de Piscis buscaban un fútbol máis directo, o filial deportivista facíao tendo máis o balón e elaborando moito a xogada. O Arosa tivo máis e mellores ocasións, especialmente unha de Nando, que rematou só un centro de Javi Pazos, pero mandando o balón por encima do longueiro.
Malia iso, cando mellor estaba o equipo local adiantouse o Deportivo nun balón que non controla Nano e Cardoso aproveita para disparar cruzado lonxe do alcance de Jorge Pérez.
Piscis arriscou tralo descanso dando entrada a Capelo por Nano, pero o Arosa botou en falta ao seu mellor dianteiro, Quique Cubas. Pablito puido empatar a falta de catro minutos, pero o seu disparo terminou nas mans do meta visitante e aí morreu o dominio arosista, que vió como a súa procura da igualada permitiu unha contra deportivista na que Jorge aproveita unha acción de Cardoso para sentenciar no desconto.
Aínda houbo tempo para o gol de Eloy que volvía achegar ao Arosa, pero de pouco serviu, xa que o árbitro pitou o final sen deixar sequera facer o saque de centro.
AROSA SC (1): Jorge Pérez; Juanjo, Martín, Alfonso (Pablito, min. 58), Nano (Capelo, min. 46); Juan, Iago; Nando, Adrián Camiño, Eloy; e Javi Pazos (Vixo, min. 58).
DEPORTIVO B (2): David; Adrián, Róber, Iago, Jorge; Sam, Marcos Remeseiro; Cardoso, Pancho, Cañi (Anxo, min. 79); e Dani Iglesias (Kim, min. 88).
Árbitro: Daniel Arias Penas (Vigo), auxiliado nas bandas por Daniel Álvarez Domínguez e José Antonio Varela Varela. Amoestou a Alfonso, polos locais, e a Sam, polos visitantes.
Goles: (0-1) Minuto 34: Cardoso. (0-2) Minuto 92: Jorge. (1-2) Minuto 94: Eloy.
Incidencias: Campo Municipal da Lomba (Vilagarcía). Uns 700 espectadores.