Irene Trabazo mantense á fronte da Copa de España de ciclocrós despois de catro probas
Por Redacción
Un mes despois do arranque oficial da tempada de ciclocrós a marinense Irene Trabazo confirmou a súa boa adapción á categoría e, tras o seu paso a júnior, mantense líder da Copa de España despois de catro probas.
Trabazo comanda a clasificación xeral con tres triunfos en catro carreiras que lle deixan con 95 puntos, polos 85 da tamén galega Desiree Duarte.
O último fin de semana comezou para a deportista do Club Ciclista Marín cunha vitoria en Laudio (Álava) ante a súa principal rival, mentres o domingo en Muskiz (Biscaia) a orde se intercambiou cun segundo lugar para Irene.
Pola súa banda o seu compañeiro no club marinense Guillermo García empeza a destacar en categoría cadete e logrou en Laudio subir ao terceiro caixón do podio. García é quinto na xeral con 48 puntos nunha categoría que domina Iván Feijoo, gañador de todas as probas disputadas ata o momento.
Sen perder de vista o principal obxectivo da tempada, o Campionato de España que este ano se disputará en Gijón, ambos os dous ciclistas afrontarán o próximo fin de semana dous novos compromisos da Copa de España de Ciclocrós.