O Arosa consegue os servizos de Nano para apuntalar a súa defensa
Por Redacción
Fernando Muelle Sanmartín, Nano, converteuse polo momento na última incorporación do Arosa de cara á inminente tempada en Terceira división. O xogador, de 25 anos, vén a cubrir unha das necesidades máis urxentes que tiña o equipo arlequinado na súa liña defensiva.
Formado na canteira do Pontevedra, a súa traxectoria máis recente pasa por Villalonga, Alondras, o mesmo Pontevedra e novamente Alondras, na pasada tempada. Nano é un xogador que destaca pola súa proxección ofensiva, pero ao que salvo na súa primeira tempada no equipo de Cangas, con Fredi no banco, lle faltou a continuidade necesaria para dar o salto de calidade que se esperaba.
Agora, ás ordes de Piscis, Nano buscará afianzarse na titularidade do conxunto arlequinado, ao que chega para apuntalar unha posición, a de lateral esquerdo defensivo, que se viu moi minguada coa lesión de Álex Freire e a marcha de José Ángel a Malta, por motivos laborais.