Reforzar o xogo interior, obxectivo dun Arxil que xa se inscribiu en Liga Feminina 2
Por Redacción
O prazo dado pola Federación Española de Baloncesto finaliza o próximo venres, pero o Club Baloncesto Arxil entregou xa este martes a documentación necesaria para competir un ano máis en Liga Feminina 2.
Tras pagar a inscrición correspondente e entregar o aval bancario, o club verde céntrase xa na composición do plantel de cara á próxima tempada, onde terá o reto de superar a clasificación do curso pasado, no que a punto estivo de meterse no play-off polo ascenso á máxima categoría do baloncesto feminino nacional.
Coas baixas xa confirmadas de Minata Keita e María Martínez, a intención dos dirixentes lerezanos é dar continuidade ao resto do bloque, ao que se lle ofreceu continuar.
Á marxe o principal obxectivo será reforzar o xogo interior do equipo, polo que os esforzos se centran en rastrexar o mercado en busca dun pivote e unha á pivote de garantías.
A partir de aí as renovacións marcarán o resto de fichaxes, pois nalgún caso como o de Jara Tuda motivos laborais poderían propiciar o seu adeus ao conxunto verde.
Ademais con respecto aos equipos inferiores o coordinador do club, Lino Vázquez, sinala que pretenden contar polo menos con outro equipo sénior, un júnior, tres cadetes, tres infantís, tres minibasket e dous pre-minibasket.
Para manter este organigrama o ideal, segundo Vázquez, sería ampliar a nómina de adestradores do club, para o que se busca a achega un novo patrocinador que permita ampliar o axustado presuposto do club arxilista.