Con todos e o respaldo da afección a pola remontada en Puertollano
Por Ramiro Espiño
Que o Pontevedra conseguiu reenganchar á súa afección nesta recta final da tempada é un feito que non se lle escapa a case ninguén. Tanto é así que nin o resultado do partido de ida ante o Puertollano, nin o custo do desprazamento, nin a distancia e a incómoda viaxe, serán obstáculo insalvable para un grupo de valentes, que acompañarán ao equipo en busca dunha remontada difícil, farto complicada, pero que ninguén quere considerar imposible.
O partido que disputarán os granates o domingo (19:00 horas) no Estadio Ciudad de Puertollano, ou Nuevo Cerrú, contará con inmensa maioría de seguidores do conxunto manchego, que esperan celebrar o ascenso do seu equipo, tras o 0-2 de Pasarón, pero tamén con preto dun centenar de irredutibles afeccionados granates, que intentarán deixarse oír, coa ilusión de conseguir dar a volta á eliminatoria e celebrar o regreso á Segunda B.
Aos afeccionados que se desprazarán polos seus propios medios, uniranse 45 seguidores que case completaron o autobús que realizará a viaxe organizada dende o club ao prezo de 40 euros, entrada incluída, e que sairá dende o Pavillón Municipal dos Deportes, ás 0:00 horas do domingo, coa intención de chegar a Puertollano a primeira hora da mañá, regresando nada máis finalizar o partido.
Dende Pontevedra, os que non poidan desprazarse estarán moi pendentes das noticias que cheguen de terras manchegas a través dos medios de comunicación que, como PontevedraViva, informarán de todo o que suceda no partido. E é que, a pesar do tropezo do pasado domingo, ninguén quere entregarse sen intentalo ata o último minuto.
Iso polo menos é o que pensa o equipo e cadro técnico granate. Tanto é así que Manu Fernández decidiu que viaxen todos os xogadores, mesmo Caco, que non poderá xogar por lesión, sendo a única excepción a de Luismi, que tamén quería estar cos seus compañeiros, e mesmo acudiu ao adestramento realizado na tarde do venres en Pasarón para desexarlles sorte, pero ao que os médicos lle desaconsellaron a longa viaxe, dada a recente intervención cirúrxica no seu xeonllo.
Os granates adestran o sábado pola tarde na Cidade do Fútbol da RFEF en Las Rozas
A expedición granate, que sairá de Pasarón o sábado, ás 8:00 horas, coa intención de deterse a xantar en Tordesillas, arredor das 13:30 horas, para logo realizar un lixeiro adestramento nas instalacións da Cidade do Fútbol da RFEF, en Las Rozas, entre as 17:00 e as 18:00 horas, para continuar logo viaxe a Ciudad Real, onde establecerán o cuartel xeral, con chegada prevista á capital alcarreña arredor das 21:00 horas.
O equipo nesta ocasión viaxará acompañado tamén polo director deportivo, Milo Abelleira.
Xogadores e corpo técnico, con anterioridade a saltar ao cesped de Pasarón, estiveron a repasar vídeos sobre distintos aspectos do rival, para intentar non deixar nada ao azar. Todos son conscientes da dificultade da empresa, pero tamén de que terán as súas opcións, se son capaces de aproveitar as súas armas.
Polo que respecta o trío arbitral designado para este último e transcendental partido da tempada está integrado por Juan Manuel Ruiz Aguilera, como árbitro principal, tendo como asistentes a Antonio Rodríguez Bonachera e Antonio Javier ÿrtega Ávila, todos eles do colexio andaluz.