O equipo feminino do Galaico proclámase campión de España en Augas Abertas
Por Redacción
Gran resultado o obtido polo Club Natación Galaico no Campionato de España Open de Natación de Augas Abertas celebrado na localidade catalá de Banyoles (Girona).
Alí o club pontevedrés subiu ao máis alto do podio á súa formación feminina, composta por Iria García, Laura Paola Montes e Itziar Aranguren, proclamándose campioas de España con 76 puntos, polos 66 do segundo clasificado, o CN Las Palmas, e os 58 do terceiro, CN Castalia.
Estes puntos chegaron cun meritorio cuarto posto de Iria García nos 10 quilómetros Sénior e a sétima praza nos 5 quilómetros, o que a situou tamén no cuarto lugar da clasificación combinada, onde Laura Paola Montes clasificou ademais como sétima tras ocupar este posto nos 10 quilómetros, mentres nos 5 rematou no décimo lugar.
Pola súa banda Iztiar Aranguren nadou a competición Júnior, sobre 7,5 quilómetros, quedando no cuarto posto a un só segundo do podio.
Tamén acudiron á cita Iago Lorenzo e Cristian Fernández, situando o Galaico na oitava posición da clasificación por equipos.
No plano individual Cristian finalizou sexto nos 10.000 metros, mentres Iago foi noveno nesta distancia, undécimo nos 5 quilómetros e sétimo na clasificación combinada.