Máis de 500 nenos de 18 equipos cítanse no XVI Cidade de Pontevedra de Fútbol-7 Benxamín
Por Redacción
O campo de fútbol da Xunqueira acollerá este fin de semana, os días 14 e 15 de xuño, a décimo sexta edición do Torneo Internacional Cidade de Pontevedra de Fútbol-7 Benxamín, organizado pola Escuela de Fútbol Portero 2000.
O FC Porto defenderá o título logrado na pasada edición ante outros 17 equipos, oito deles procedentes da fase previa.
Entre eles destaca o Athletic Club, que debuta no torneo, ademais de Atlético de Madrid, Valladolid, Benfica, Sporting Braga, Celta ou Deportivo.
Completan o cartel outros equipos galegos como o Portero 2000 como anfitrión e Gondomar, Salgueiriños, Sagrado, Lugo, Victoria, Xuventude Oroso, Areosa, Coruxo e Pabellón.
O torneo arrancará ás 10:00 horas do sábado, cunha xornada intensiva ata as 21:00 horas, e pecharase coa final o domingo ás 13:30 horas.
Na presentación do evento, celebrada este martes no Hotel Galicia Palace, o futbolista do Liverpool Iago Aspas exerceu como padriño de luxo da presente edición.