Pablo Lede, Fran Fandiño, Kevin Levis e Caco con problemas físicos na volta ao traballo
Por Ramiro Espiño
Non había as mellores caras ao comezo do adestramento de recuperación realizado polo Pontevedra na tarde do luns no sintético da Xunqueira. Os xogadores reflectían a súa contrariedade por non poder obter un mellor resultado co que afrontar o partido de volta fronte ao Portugalete. Pero eses rostros serios pronto deixaron paso a un moderado optimismo, ao convencemento de que poden conseguir reverter a situación no partido de volta.
Manu Fernández comezou a sesión cunha breve charla cos seus homes no mesmo terreo. Logo deu paso a unha suave sesión, con lixeiros exercicios físicos para todo o grupo, seguidos de partidillos en espazo reducido para ir soltando lastre.
Catro ausencias no grupo fixéronse notar. Tres delas como consecuencia de diversos contratempos sufridos no partido ante o Portugalete. Son os casos de Pablo Lede, Kevin Levis e Fran Fandiño. O cuarto foi Caco, aínda que neste caso debido a un problema anterior.
Nada preocupante, polo menos en principio. Todos deben chegar a punto e estar en condicións para o próximo domingo, e mesmo para poder traballar cos seus compañeiros dende o mesmo mércores, tras a xornada de descanso que terán o martes.
Pablo Lede e Kevin Levis pasaron ás mans da fisioterapeuta, Nerea Videira. O primeiro para ser atendido dun problema no glúteo que lle causa dores de costas. O arxentino por precaución, como consecuencia do golpe sufrido na cabeza nun salto co central vasco Etxaniz, que lle ocasionou unha pequena brecha.
Fran Fandiño chegou cando os seus compañeiros xa finalizaban o traballo. Antes acudira á consulta do doutor Alberto Domínguez. Durante o partido sufriu un violento choque co porteiro Urko Macías, que o golpeou con forza no abdome. Aínda que puido continuar o partido, durante a noite sentiu fortes dores, sufrindo mesmo vómitos, motivo polo cal foi atendido polo médico que lle prescribiu a oportuna medicación e descanso dun par de días, esperando que evolucione de forma satisfactoria.
Outro que pasou polas mans do médico do club foi Caco, que presenciou o traballo dos seus compañeiros dende a bancada. No seu caso despois de ter sido infiltrado o mesmo luns polo doutor para aliviar unhas dores que ten no talón do seu pé dereito, que vén arrastrando dende o partido xogado en Negreira. A intención é que con dous días de descanso o mércores poida poñerse ás ordes do adestrador, por se considera oportuno contar cos seus servizos para o decisivo partido do domingo.