Limpos de tarxetas para afrontar a fase de ascenso
Por Diego Espiño
Ao contrario que o que acontecía en tempadas pasadas, a lóxica impera agora nas bases de competición de Segunda B e Terceira División.
A normativa fixada a comezo de curso establece que unha vez finalizada a fase regular, todos os xogadores empezarán un novo ciclo de amoestacións.
Deste modo quedan sen efecto as tarxetas que acumulaban os futbolistas, unha situación que favorece especialmente a Kevin Levis e Pablo González, que contaban xa con catro amarelas e se encontraban a unha da suspensión.
Agora a fase de ascenso actúa como unha nova competición cun ciclo de amoestacións que se reduce a tres tarxetas e no que todos comezan de cero.
O que si se manteñen son as sancións derivadas da última xornada da liga regular, pero no caso do Pontevedra ningún xogador se encontra castigado, ao igual que no seu primeiro rival polo ascenso, o Portugalete.
Así pois a única preocupación de Manu Fernández céntrase no estado de Luismi, que continúa cos seus problemas no xeonllo e a pesar de que empezou a incorporarse este mércores ao traballo de grupo é baixa segura no primeiro partido do play-off.
O dianteiro é o único integrante do primeiro plantel que non está a disposición do técnico granate na fase decisiva da tempotrada, despois dunha liga na que as lesións formaron parte do día a día do equipo.
Nesta ocasión, malia o tropezo en Dorneda, o Pontevedra chega ao play-off no seu mellor estado da tempada e preparado para afrontar o reto de loitar polo ascenso.
Tras o descanso do martes o bloque lerezano exercitarase durante o resto da semana, incluído o sábado, para chegar en óptimas condicións ao encontro do domingo en Pasarón.