A derrota en Torrelavega (30-23) deixa o Teucro coa auga ao pescozo
Por Redacción
Gañar ao campión, Barcelona B, no Municipal a próxima semana e esperar que o Pozoblanco non o faga en Benidorm. Son as opcións que lle quedan ao Teucro para evitar xogarse a tempada nunha complicada promoción de permanencia xunto a Palma del Río e Chapela.
A derrota fronte ao Torrelavega puxo ao conxunto pontevedrés nun escenario impensable non hai moito, pero ao que se chega como consecuencia dun cúmulo de factores como lesións e falta de experiencia, pero tamén dunha segunda volta ligueira para esquecer.
Tras o esvarón da pasada semana ante Handbol Bordils, sabíase que ía resultar complicado xogárseo todo nunha pista como a cántabra, e fronte a un equipo en xeira de resultados como o Torrelavega. E así foi. Aínda que o equipo o intentou, e por momentos parecía que podía optar á vitoria, o partido se lle fixo longo e na recta final os locais escaparonse de forma clara e venceron con xustiza.
Comezou o Teucro levando a iniciativa, pero sempre con vantaxes mínimas que eran rapidamente neutralizadas polo cadro laranxa, que se puxo por primeira vez por diante mediado o primeiro período. Aínda así os teucristas aguantaron, mesmo cando o Torrelavega deu un tirón, cun parcial de 3-0 que permitiulles pasar do 9-10 (que sería a última ocasión na que os pontevedreses estiveron por diante) ao 12-10.
O resultado ao descanso, cun só gol por debaixo, permitía seguir albergando esperanzas, e máis cando nada máis iniciarse o segundo tempo David García Pichel conseguía empatar de novo o partido.
Os empates repetiríanse, pero xa sempre con iniciativa local, ata que o Torrelavega, en pouco máis de dous minutos repite un parcial de 3-0 para conseguir marchar con tres de vantaxe (18-15, minuto 38). Sería o principio do fin para o Teucro, que xa non se repoñería.
Os teucristas están obrigados a gañar á Barcelona B no Municipal a próxima semana e esperar que o Pozoblanco non o faga en Benidorm
De nada serviu a tímida reacción visitante, que novamente se poñía a un só tanto, cando Alejandro Pombo facía o 20-19. Quedaban 16 minutos para o final, que foron un calvario para os de Javier Barrios. Os teucristas atascáronse en ataque e o conxunto local non tivo problemas para distanciarse con comodidade, ata alcanzar unha vitoria máis clara no marcador que no xogo, que lle dá a salvación matemática, ao mesmo tempo que obriga o Teucro a xogárseo todo no último partido para eludir a perigosa promoción de permanencia.
BM TORRELAVEGA (30): Jorge Pérez, Jacob Melián; ÿscar Arroyo, Guillermo Barbón (4), José Antonio Calderón (1), Eugenio González, José Carlos Hernández (6), Abel Lamadrid (2), Thor Larsen (3), Borja Lombilla (1), Joaquín Marcos (6), Javier Peña (3), Alberto Pérez (3) e Jadim Omar Sour (1).
SD TEUCRO (23): Dani Cadilla, Héctor Gil, César Armán (2), Marcos Dorado, Borja Pedreira, Carlos García (5), David García Pichel (5), Tomás Moreira (4), Carlos Pombo, Alejandro Pombo (2), Miguel Porto (4), Víctor Rodríguez, Miguel Sío (1) e Aser Costal.
Árbitros: Miguel Gardón Teixeira (Madrid) e Antonio Martín García (Castela e León). Excluíron por dous minutos a José Antonio Calderón, Abel Lamadrid (3, descualificado a falta de 3' 49"), Borja Lombilla e Joaquín Marcos, polos locais, e a César Armán, Marcos Dorado, Borja Pedreira e Miguel Porto, polo Teucro.
Marcador (cada cinco minutos): 2-3, 4-5, 7-6, 9-9, 12-10, 13-12 (descanso), 15-14, 18-16, 21-19, 24-20, 27-21 e 30-23 (final).
Incidencias: Pavillón Municipal Vicente Trueba (Torrelavega). Uns 900 espectadores.