A SCD Pontecaldelas recibe 22.000 euros do concello para a súa escola de fútbol
Por Redacción
O alcalde de Ponte Caldelas, Perfecto Rodríguez, e o presidente da Sociedade Cutural e Deportiva Pontecaldelas, Pedro César Rodríguez Souto, asinaron un convenio de colaboración dotado de 22.000 euros para fomentar a práctica e o ensino deportivo na Escola de Fútbol que mantén operativa o club nas instalacións do Campo Municipal de Chan dA Barcia.
Este acordo, agora renovado, permite a Escola de Fútbol da S.C.D. Pontecaldelas continuar co seu importante labor formador de nenos e nenas.
Perfecto Rodríguez destacou a importancia do labor que desenvolve esta institución entre a xuventude do municipio e puxo en valor o esforzo que realiza o Concello para manter todos os anos como unha das súas prioridades a subscrición deste acordo.
O alcalde sinalou o importante traballo que realiza esta Escola de Fútbol, non só no apartado deportivo senón tamén no seu carácter como formadora e educadora de nenos que, dende os 5 ou 6 anos inícianse na práctica deportiva e aprenden tamén hábitos de hixiene persoal, traballo en equipo, o valor do sacrificio e do esforzo para conseguir os seus obxectivos. En total integran a Escola de Fútbol un total de 130 entre nenos e mozos.
Pola súa banda, o presidente da S.C.D. Pontecaldelas agradeceu ao alcalde o respaldo da institución municipal ao traballo que realiza esta Escola de Fútbol e sinalou que o compromiso do club está ligado non só aos resultados deportivos senón á creación das condicións necesarias para favorecer o acceso de todos aqueles nenos e nenas que así o desexen á práctica do fútbol nun ambiente de harmonía que favoreza a formación como persoas dun gran número de mozos.
Pedro Rodríguez trasladou o agradecemento da súa xunta directiva ao Concello e sinalou que sen o apoio municipal, non só a través deste convenio, senón tamén coa cesión das instalacións de Chan da Barcia, o traballo da S.C.D. Pontecaldelas e a súa Escola de Fútbol sería imposible.