Un triunfo para evitar problemas
Por Diego Espiño
Importante partido para a Sociedad Deportiva Teucro no Pavillón Municipal dos Deportes (sábado 20:00 horas) ante o Calmec Barakaldo.
Pontevedreses e vascos encóntranse empatados na clasificación con 25 puntos, a catro da última praza que dá dereito a xogar o play-off de ascenso á Liga Asobal pero á mesma distancia do Pozoblanco, equipo que marca a fronteira da fase pola permanencia.
Por ese motivo os dous puntos en xogo antóllanse vitais para ambos os dous conxuntos para, por un lado, seguir aspirando a un ascenso que se antolla complicado, e por outro afastarse da zona de perigo e vivir con maior tranquilidade as últimas xornadas da liga regular.
Para conseguir o triunfo os de Javier Barrios deberán empregarse a fondo ante un equipo, o vasco, que chega á cidade do Lérez tras gañar na súa casa ao segundo clasificado, o Benidorm, pero que non poderá contar cun dos seus xogadores máis destacados, o lateral Pablo Paredes, convocado pola Selección Española Júnior.
Os colexiados cataláns Ausas Busquets e Florenza Virgili serán os encargados de dirixir o choque.