A Lanzada acollerá unha das dúas únicas probas do mundial de surf que se disputa en España
Por Redacción
Do 10 ao 13 de abril a praia de A Lanzada acollerá unha das dúas únicas probas do campionato mundial de surf que se disputarán en España, e, xunto co Pantín Classic, será unha cita obrigada para os mellores surfistas a nivel nacional e internacional.
No acto de presentación, celebrado este venres na Deputación, subliñouse a capacidade de atracción desta nova edición do Surf Rías Baixas Pro, tras o ascenso de categoría deste evento, que pasa da proba junior que era o pasado ano a proba clasificatoria do mundial, cunha estrela da Asociación de Surf Profesional.
A categoría acadada garantiza a presenza das máis representativas figuras do surf a nivel nacional e tamén internacional. Así, nestes momentos son xa 80 os inscritos (60 para as probas masculinas e 20 para as femininas) e agárdase que a inscrición aumente de aquí a que remate o prazo, o vindeiro mércores.
Segundo informou Marcos Rodríguez, representante da organización, entre os inscritos está Gony Zubizarreta, o deportista vigués situado na elite deste deporte.
Outros dos participantes serán Joan Durú, Campión de Europa 2009 e Tom Cloarec dende Francia, o portugués Rubén González, ou os surfistas nacionais Hodei Collazo, Vicente Romero, Eneko Acero ou o brasileño Caue Wood.
Entre as participantes femininas destaca a presenza de Alize Arnau, campiona Mundial Junior Femenino ASP 2010; Maud Le Car, a promesa do surf francés; Garazi Sánchez, primeira muller española que participou no Circuito Mundial WQS ou Leticia Canales, 9ª do mundo no Ranking da ASP Junior.
1.000 BAUTISMOS DE SURF
Como complemento ao campionato, as escolas de surf colaboradoras no evento (Tartaruga, Riders, Mission e Prado) desenvolverán unha serie de actividades paralelas gratuítas e abertas a todos, tanto a achegar este deporte á sociedade en xeral como a crear conciencia ambiental. Está previsto que participen unhas 1.000 persoas.
Así, repetirase durante os catro días a exitosa experiencia da pasada edición cos bautismos de surf, neles poderán participar todos os interesados a partir de 9 anos.
Tamén charlas do construtor de táboas de Zorlak Surfboards, rescate con moto acuática, sinatura de autógrafos e actividades de concienciación ambiental, con dúas limpezas de praias que terán lugar o venres e o sábado.
Relacionadas:
-
Segundo día sen ondas na Lanzada
Por Diego Espiño |
-
Suspendida a primeira xornada do Rías Baixas Surf Pro por falta de ondas
Por Diego Espiño |
-
O surf borra as fronteiras na Lanzada
Por Oskar Viéitez |
-
O Surf Rías Baixas Pro 'sobe de categoría' e convértese nun campionato internacional absoluto
Por Alejandro Espiño |