Arxil-Cortegada, último tren para o play-off
Por Redacción
O Centro Galego de Tecnificación Deportiva acollerá este sábado (19:30 horas) un partido de rivalidade entre o Arxil pontevedrés e o Cortegada de Vilagarcía na que se presenta como última oportunidade de asaltar a cuarta praza, que dá dereito a xogar o play-off de ascenso á máxima categoría.
Ambos os dous equipos encóntranse igualados na clasificación, con nove vitorias e dez derrotas, a un triunfo do Adba Avilés e a dous do Celta con tres xornadas por disputarse.
Esta semana preséntase propicia para recortar esa distancia, pois o conxunto vigués se enfronta ao terceiro clasificado, o Al-Qázeres, e as asturianas ao líder, Ensino de Lugo.
Gañar reforzaría pois a Arxil ou Cortegada, pero unha derrota descartará o vencido definitivamente da loita polo ascenso.