Vantaxe de campo para o CW Galaico no play-off polo título galego
Por Redacción
Por primeira vez o Club Waterpolo Galaico Pontevedra finalizou a liga regular na cabeza da clasifiación, o que lle outorga a vantaxe de campo no play-off polo título galego que comeza xa o próximo sábado, 22 de marzo.
O conxunto lerezano defenderá o título logrado hai un ano enfrontándose en semifinais, ao mellor de tres partidos, ao Marina Ferrol, cuarto clasificado.
O primeiro encontro disputarase na cidade departamental, mentres os dous seguintes, en caso de ser necesario o terceiro partido, terán como escenario Pontevedra.
A outra eliminatoria xogarana o Club Natación Coruña e Club Waterpolo Santiago.
En canto ao Galaico, o equipo adestrado por Javi de Sáa asegurouse o primeiro posto tras vencer na última xornada a domicilio e de xeito contundente ao que será o seu rival nas semifinais, o Marina Ferrol (10-19).
XORNADA DE TECNIFICACIÿN
O Coordinador Nacional de Waterpolo, Antonio Aparicio, dirixiu o pasado sábado en Pontevedra unha Xornada de Tecnificación integrada no Plan Nacional de Tecnificación Deportiva.
Aparicio puido comprobar os progresos de 20 waterpolistas galegos de categoría cadete, entre os que se atopaban sete xogadores do Galaico.