Sergio Míguez, do Súper Froiz, sitúase terceiro na xeral da Copa España
Por Redacción
ÿ unha das espiñas cravadas do Grupo Deportivo Supermercados Froiz, e é que a Copa de España Elite e sub-23 se lle resiste tradicionalmente á escuadra dirixida por Evaristo Portela, equipo número un do ranking nacional nos últimos anos.
A situación pode cambiar esta tempada, despois de que Sergio Míguez, tras disputarse as tres primeiras probas da competición, ascendese a terceira posición da clasificación xeral, convertendo a Copa de España nunha prioridade, segundo recoñece Portela: "tenemos una oportunidad y vamos a intentar aprovecharla".
Aínda que non subiu ao podio aínda, Míguez estase a mostrar moi regular, chegando sempre no grupo de cabeza.
Este fin de semana, no Gran Premio de Macario disputado en Alcalá de Henares, o ciclista do equipo pontevedrés rematou na duodécima posición nunha carreira decidida ao sprint.
Tras esta proba a xeral a comanda Zhuralev, con 257 puntos, por diante de Inziarte, con 253 e do propio Míguez, con 250, a falta de cinco días de competición.
A próxima cita será o Trofeo Guerrita, en Alcantarilla (Murcia), o próximo domingo 30 de marzo.
DE SEGOVIA ROZA O TRIUNFO NO TROFEO IBERDROLA
Antonio de Segovia quedou ás portas de vencer no prestixioso Trofeo Iberdrola, despois de verse superado nun apertado final por Iván Martínez, o actual campión de España Elite.
O corredor do Froiz cedeu no sprint final despois de coller a escapada boa do día, na que tamén se encontraban os seus compañeiros Pedro Merino, que finalizou cuarto, e David Francisco, quinto.