130 parellas compiten no III Trofeo Concello de Marín de Baile Deportivo
Por Redacción
O III Trofeo Concello de Marín de Baile Deportivo, Campionato Galego Standard e Open Internacional ArtDance de Bailes Latinos reunirá en Marín este domingo 16 de marzo a 130 parellas.
A cita, que se celebrará no pavillón da Raña dende as 11:30 horas da mañá, é ademais proba puntuable para o Ranking Nacional da Federación Española de Baile Deportivo.
As finais das categorías infantís e o Campionato Galego disputaranse entre as 15:30 e as 18:00 horas, mentres está previsto finalizar coas categorías nacionais de latinos ás 20:30 horas.
O evento está organizado polo Club de Baile Pasos-Bailegalicia coa colaboración do Concello de Marín e contará cunha entrada de seis euros, cun desconto para xubilados e sendo de balde para os nenos.
Entre os participantes destaca a presenza dos oito veces campións de España Adrián Esperón e Patricia Martínez.