O Enmacosa Monte Porreiro achégase á permanencia tras gañar ao segundo clasificado
Por Redacción
Importante triunfo do Enmacosa Monte Porreiro para achegarse á permanencia na División de Honra masculina de tenis de mesa.
O equipo pontevedrés impúxose en Príncipe Felipe ao segundo clasificado, o Gabitec Ceuta, por un apertado 4-3 nun duelo que tivo que decidirse no punto de dobres.
Resultou clave a boa actuación de Daniel Conic nos partidos indivuduales. Pola súa banda Nacho Fernández gañou un dos seus encontros e perdeu noutro que xogou, mentres Santi Prieto cedeu nos seus dous compromisos.
Todo se decidiu co dobres composto por Dani e Nacho, que tiveron que remontar ata en dúas ocasións para impoñerse nun emocionante final.
Con este triunfo o Enmacosa sitúase en quinto lugar con 18 puntos, a 10 dos postos de descenso pero con máis partidos xogados que os seus rivais directos.
DERROTA DO EQUIPO FEMININO
O que xa ten a permanencia no peto son as rapazas do Setga Monte Porreiro, que na última xornada da División de Honra Femennina cederon na casa ante o School Zaragoza por un resultado de 3-4.