Máis de 80 equipos participarán no XIII Tríatlon Concello de Vilagarcía
Por Redacción
O deporte volverá invadir as rúas de Vilagarcía o domingo 29 de setembro coa celebración do XIII Tríatlon Concello de Vilagarcía.
O evento, que estaba previsto que se celebrase o 1 de setembro, foi aprazado polas obras de saneamento que se estaban realizando na avenida de Valle Inclán. Agora, con todo despexado e acondicionado, a proba poderase realizar en "perfectas condicións para garantir a seguridade dos participantes".
Serán en total 81 os equipos rexistrados tanto masculinos como femininos das categorías absoluta, open e escola. Ademais, a proba forma parte do circuíto do Campionato Galego por equipos contrarreloxo.
As distancias adaptaranse a cada categoría, establecéndose para o Campionato Galego absoluto e o Open 750 metros a nado, 20 quilómetros en bicicleta e 5 quilómetros a pé, e na modalidade escolar 300 metros de natación, 10 quilómetros de ciclismo e 2,5 quilómetros a pé.
O evento organizado pola Fundación Municipal de Deportes volverá ter como epicentro Vilaxoán. A proba de natación realizarase en augas do peirao desta localidade e alí establecerase tamén a liña de saída e meta dos circuítos das carreiras ciclista e pedestre. O circuíto de ciclismo comezará na transición situada na chaira da rúa Preguntoiro pola rúa do Peirao, virando á esquerda por Avelina Nogueira, para continuar pola rúa Víctor Pita e Valle Inclán ata o punto de retorno situado á altura da rúa Alexandre Bóveda, xa en Vilagarcía, desde onde se regresará de novo por Valle Inclán, continuando por Víctor Pita e rúa Preguntoiro.
Por último a carreira a pé establécese nun circuíto de dúas voltas para a proba absoluta, comezando desde a zona de transición do peirao de Vilaxoán ata o punto de retorno, regresando polo mesmo porto e continuando pola rúa Preguntoiro ata o final da mesma.