O deporte regresará a Fontecarmoa "en cuestión de días"
Por Redacción
"En cuestión de días", o pavillón de deportes número 1 de Fontecarmoa estará listo para volver albergar a actividade deportiva.
Coas obras xa rematadas, o alcalde de Vilagarcía, Alberto Varela, ten previsto visitar o pavillón o mércores e comprobar o estado final do ambicioso proxecto no que investiron algo máis de 2 millóns de euros. A partir dese momento, "o equipamento porase a disposición dos clubs deportivos que poderán comezar a usalo a finais desta mesma semana", sinalou.
Coa execución deste proxecto, Vilagarcía contará cun pavillón que viu renovada a súa imaxe tanto de forma interna como externa e disporá dunha infraestrutura deportiva moderna, eficiente enerxeticamente e confortable tanto para a práctica do deporte como para o público.
Tal e como destacou o rexedor, a actuación consistiu en cambiar a cuberta, recubrir as fachadas e instalar un sistema de climatización axeitado para así resolver os graves problemas de humidades e condensación que sufría o edificio construído hai máis de 40 anos. Tamén substituíron toda a instalación eléctrica tanto na cancha, como nos vestiarios, aseos e restos de dependencias. A intervención incluíu a reforma e mellora da zona de vestiarios, os aseos e o perímetro da cancha.
Ademais, instalaron un parque de placas solares coas que se xerará enerxía eléctrica para abastecer á propia instalación deportiva, converténdoa nun edificio sostible e eficiente enerxeticamente.
A reforma integral do pavillón contou cun orzamento de case 2,2 millóns de euros. A administración local financiou 1.779.428 (1.353.874 directamente e 425.554 con parte dos fondos que lle corresponden a Vilagarcía con cargo ao Plan Concellos da Deputación) e os 350.000 euros restantes son a achega que fai a Secretaría Xeral para o Deporte.