Un gran Poio Pescamar gaña o Burela (3-0), iguala a semifinal e soña en grande
Por Diego Espiño
O Poio Pescamar non se rende, e soña con facer algo grande na que é a súa segunda presenza nun play-off polo título de liga en Primeira División.
O conxunto vermello recibía este sábado na Seca o gran favorito ao título e a súa particular besta negra, o Burela Pescados Rubén, que levara o primeiro duelo da semifinal a pasada semana na súa cancha.
Sabían no equipo conserveiro que era todo ou nada, e por iso saíron a por todas empuxadas pola bancada do municipal. De feito aos dous minutos Irene Samper rozou o gol, pero o seu disparo topou coa madeira.
Tamén avisou do seu perigo o cadro visitrante, deixando claro que era un duelo intenso, disputado de poder a poder e que se ía a decidir por detalles.
Así foron pasando os minutos ata que a 6 do descanso Elena adiantaba a súa posición abandonando portería, cruzaba a divisoria e coa defensa afundida filtraba un pase ao corazón da área que Ale de Paz remataba co calcaño ao fondo da portería facendo o 1-0.
Pedía tempo morto o Burela para reaxustarse e tentar reaccionar, pero o marcador xa non se movería ata o descanso, aínda que Emily estivo preto obrigando a lucirse a Elena baixo paus.
Tras o paso por vestiarios o equipo lucense foi a por a igualada. Dany tivo unha ocasión inmellorable nun saque de esquina, pero con todo a favor non conectou ben co balón.
O Poio Pescamar pola súa banda resistía con intensidade e concentración á espera de poder golpear de novo. Tivo opcións para iso, e terminouno conseguindo a 9 minutos do final de novo por medio de Ale de Paz. Saque en longo para Laura Uña, esta baixa o coiro, dispara cruzado e Ale interponse para desviar o balón á rede.
A sete minutos para a conclusión o Burela apostaba polo xogo de cinco para tentar apertar o duelo, pero tras o seu primeiro disparo Elena sacaba con rapidez para Laura Uña collendo nun mal repregamento ao seu rival e facendo o 3-0.
Seguiu con porteira-xogadora o equipo visitante, pero o Poio defendeuse con acerto ata o final para lograr unha valiosa vitoria, que empata a semifinal e forza o desempate para soñar en grande. A final de liga poñerase en xogo a domicilio, en Burela, pero a un partido todo pode pasar.
Consulta aquí a acta do partido entre Poio Pescamar e Burela Pescados Rubén.