Antía Chamosa, bronce mundialista por equipos nos 20 quilómetros marcha
Por Almu Dapena
Antía Chamosa continúa demostrando semana tras semana que non ten teito e proba diso son os resultados que está a lograr alá por onde vai.
O último deles foi bronce logrado este domingo co equipo nacional feminino nos 20 quilómetros Campionato do Mundo de Marcha que se celebra na cidade turca de Antalya. Alí, a deportista pontevedresa compartiu formación con Lidia Sánchez-Puebla, Paula Juárez e Lucía Redondo, realizando unha gran exhibición que valeu o terceiro posto mundialista.
A primeira española en cruzar a liña de meta foi Sánchez-Puebla, oitava cun tempo de 1:30:24. Antía foi novena con 1:30:32, pulverizando ademais o récord galego; Juárez chegou no posto 14 con 1:31:56 e Redondo, 21 con 1:33:03.
A atleta da Ximnástica recoñeceu ao finalizar a proba que "non foi fácil, facía moita calor, pero sentímonos moi animadas por todo o equipo". Está "moi contenta" tamén por mellorar a súa marca persoal e, sobre todo, por quedar "terceiras do mundo". Todo un logro.