![](/web/cache/scene/uploads/fotos/foto/5d7/_S7QytKoutjK3UsovKMnMzytWsi62MjawUqrKz891Lsov0DGzMN_/_AxNjDQSU7NK0kt0snNTEnJSVWyrgUA_/660d3a727d-20240403-patxot-campeonato-espana-karate-1259.jpg)
© Mónica Patxot
O Campionato de España Absoluto de Karate aterra en Pontevedra: "O nivel vai ser impresionante"
![Diego](/web/cache/scene/uploads/xornalistas/foto/5df/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/570532d2ea-20160329-patxot-diego-espino-1009.jpg)
Por Diego Espiño
![](/web/cache/scene/uploads/fotos/foto/052/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/660d3a674d-20240403-patxot-campeonato-espana-karate-1258.jpg)
© Mónica Patxot
![](/web/cache/scene/uploads/fotos/foto/228/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/660d3a859d-20240403-patxot-campeonato-espana-karate-1256.jpg)
© Mónica Patxot
Todo listo para que o Pavillón Municipal dos Deportes acolla entre o venres 5 e o domingo 7 de abril o Campionato de España Aboluto de Karate e Para-Karate.
Serán preto de medio milleiro os deportistas que participarán no evento, o cuarto de nivel nacional que acolle a Boa Vila pero o de maior nivel ata a data.
De feito segundo o presidente da Federación Española de Karate, Antonio Moreno, "o nivel do campionato vai ser impresionante tanto en karate como en parakarate, vindo os campións do Mundo e os campións de Europa. E ademais é clasificatorio para Croacia porque de aquí a dous meses temos o Campionato de Europa", explicou na presentación do torneo acompañado do alcalde de Pontevedra, Miguel Anxo Fernández Lores; o secretario xeral para o deporte da Xunta, José Ramón Lete; e o presidente da Federación Galega de Karate, Óscar Lafuente.
"Quero animar a toda a veciñanza de Pontevedra a que veña e goce deste evento e das diferentes modalidades que competirán", sinalou de feito o presidente da federación autonómica.
Dentro da programación prevista destaca a homenaxe que a Federación Española realizará ás 18.30 horas do sábado ao equipo nacional feminino recentemente proclamado campión do mundo, así como aos campións de para-karate.
"Seguiremos traballando á hora de seguir traendo este tipo de citas, mesmo máis grandes na medida que contemos con mellores instalacións deportivas", afirmou pola súa banda na súa intervención Miguel Anxo Fernández Lores.