Da goleada ao sufrimento. O Arosa xa mira cara a arriba tras impoñerse (4-3) ao Negreira
Por Redacción
Non estaba A Lomba para florituras. O mal estado do terreo de xogo deparou un partido con moitos goles e incerteza final, pero con non demasiado bo xogo. O Negreira mandou na primeira media hora, pero faltoulle acerto nos metros finais e pagouno caro. Os arlequinados puideron golear logo, pero remataron pedindo a hora, tras encaixar dous goles en accións a balón parado.
O fútbol ten estas curiosidades. O día en que aos de Piscis lle faltaban os seus homes punta foi precisamente cando logrou a maior cifra de goles dende o seu regreso á terceira división, obtendo unha vitoria que lle permite sumar os 40 puntos que se considera garanten a permanencia, polo que a partir de agora os de Piscis xa poden mirar cara ao máis alto e formularse metas maiores nunha tempada máis que notable.
Ao comezo o Arosa equivocouse, intentando un fútbol combinativo, imposible para as condicións que presentaba A Lomba, pesado e embarrado. O Negreira xogou máis directo, pero o pulo duroulle xusto ata que chegou o primeiro gol, ao fío da media hora, tras unha internada de Eloy que non puido rematar Ramón pero si Pablo Pillado, para inaugurar o marcador.
Pouco antes de irse ao descanso chegaba o segundo gol arlequinado, obra de Alfonso, que parecía sentenciar o partido. Non obstante, nada máis comezar a segunda parte Ángelo recortaba distancias.
Certo é que as esperanzas visitantes duraron pouco, pois tras o saque de centro o Arosa forza un corner que Martín remata de cabeza, facendo o terceiro para os arosanos.
O 4-1 chegaba tras un penalti fabricado por Ramón, que rouba un balón, é derrubado na área, e el mesmo se encarga de transformar. Foron os mellores minutos dun Arosa que tivo ata tres ocasións de facer o quinto gol, pero que viu como en dúas accións de falta, primeiro Ángelo e logo Amoedo poñían ao Negreira en disposición dunha remontada incrible.
Os de Piscis aguantaron o tirón para rematar vencendo aínda que con apuros nuns minutos finais de dominio visitante, pero sen que o Negreira conseguise inquietar seriamente a portaría de Jorge Pérez.
AROSA S.C. (4): Jorge Pérez; Juanjo, José Ángel, Martín, Alfonso, Rivas, Álex Freire, Pablo Pillado, Ramón (Jonathan, minuto 88), Jesu (Vixo, minuto 79) e Eloy (Nando, minuto 70).
S.D. NEGREIRA (3): Diego Penas; Anxo, Bautista (Diego Gesto, minuto 39), Amoedo, Ángelo, Jesús, Adrián, Gonzalo, Diego Otero, Juan (García, minuto 68) e Alvarito (Toja, minuto 70).
Árbitro: Rodríguez Barreira (Vigo). Amoestou aos locais Jorge Pérez, José Ángel, Martín, Eloy e Jonathan, e ao visitante Diego Penas.
Goles: (1-0) Minuto 29: Pablo Pillado. (2-0) Minuto 44: Alfonso. (2-1) Minuto 48: Ángelo. (3-1) Minuto 49: Martín. (4-1) Minuto 58: Ramón, de penalti. (4-2) Minuto 69: Ángelo. (4-3) Minuto 82: Amoedo.
Incidencias: Campo Municipal da Lomba. Uns 650 espectadores.