Ensino de Lugo, terceiro e último coco seguido para o Arxil
Por Redacción
Antes de rematar o seu particular Tourmalet, o Club Baloncesto Arxil debe afrontar aínda o terceiro encontro consecutivo ante un dos colíderes da Liga Feminina 2.
Este vez o rival será o Durán Maquinaria Ensino e, a diferenza dos dous últimos compromisos, as verdes xogarán na casa, no Centro Galego de Tecnificación Deportiva (sábado 19:30 horas).
Tras dúas boas actuacións sen premio, en Cáceres e Ferrol, as de Mayte Méndez, que se encontran na zona media da clasificación a dúas vitorias da fase de ascenso e a dous do play-off pola permanencia, buscan un triunfo co que gañar tranquilidade para afrontar a parte final da tempada.
Non será tarefa sinxela para o Arxil ante un equipo que só perdeu un encontro na presente liga, pero a melloría mostrada polas verdes co paso das xornadas reforza a moral dun bloque que se mostrou capaz de competir cos primeiros da táboa.