Tratamento de urxencia para mellorar o estado do céspede de Pasarón durante o Nadal
![Diego](/web/cache/scene/uploads/xornalistas/foto/5df/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/570532d2ea-20160329-patxot-diego-espino-1009.jpg)
Por Diego Espiño
![](/web/cache/scene/uploads/fotos/foto/8d3/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/65831751f3-4.jpg)
© Pontevedra Club de Fútbol SAD
![](/web/cache/scene/uploads/fotos/foto/5d3/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6583177b1c-2.jpg)
© Pontevedra Club de Fútbol SAD
O Pontevedra Club de Fútbol iniciou este mércores un tratamento para tentar mellorar o estado do terreo de xogo do Estadio Municipal de Pasarón, que a pesar de ser cambiado por completo no verán viuse gravemente danado polas choivas e o seu uso dos últimos meses.
Aproveitando o parón de Nadal entende o club granate que é o momento adecuado para actuar, ao cambiar a tendencia meteorolóxica e sobre todo porque non volverá ter un partido en casa ata o 21 de xaneiro, cando o Real Valladolid Promesas visita a cidade de Lérez debido a que as dúas primeiras xornadas do ano serán a domicilio.
Segundo explicou a entidade pontevedresa, están a levarse a cabo tarefas de picado e recebado con area, ademais de resementado e subministración de nutrientes para combater o rápido empeoramento do céspede durante os chuviosos meses de outubro e novembro xunto a unha primeira semana de decembro na que se xogaron dous encontros en Pasarón en apenas 48 horas, co España-Italia da liga de Nacións e o Pontevedra-Compostela.
Asegura o Pontevedra que a súa intención é "poñer todos os medios posibles para alcanzar a posta a punto do céspede".