Caruma canta fados e temas tradicionais na Casa da Cultura de Lérez
Por Redacción
O grupo musical Caruma actúa este venres 31 de xaneiro ás 20.30 horas na Casa da Cultura de Lérez dentro das actividades organizadas no ciclo 'Venres Culturais Cedofeita'.
A agrupación musical Caruma comezaba a súa carreira da man da Asociación Sociocultural O Burgo formando parte da orquestra que interpretou a música do espectáculo 'Non tempo do cruel Herodes'. Varios dos músicos decidiron formar este grupo que ten como principal fundamento crear temas orixinais e en lingua galega. En xaneiro de 2004 formábase Caruma cun repertorio que conta con cancións nas que se combina o folk con estilos pops, latinos ou blues.
Nos últimos anos, a agrupación foi incorporando fados. As letras están elaboradas, normalmente, polos integrantes do grupo aínda que tamén interpretan algunhas cancións tradicionais ou de poetas galegos como Rosalía de Castro ou Cabanillas. A dirección musical corresponde ao músico cubano, Joseito Reyes que está acompañado pola voz de Carmen Redondo, o baixo de Sergio Casal e a guitarra acústica de Jaime Simón.
No concerto deste venres, o público poderá gozar de nove cancións de creación propia, ademais de cinco fados e dous temas galegos tradicionais. A entrada é libre ata completar o aforamento.
A seguinte actividade prevista na programación dos 'Venres Culturais Cedofeita' estará dedicada á proxección da curtametraxe Flores para Amalia, dirixido polo pontevedrés Nani Matos.