Resonet abre o venres 14 o ciclo de Noites de Música Antiga na igrexa do convento de Santa Clara
Por Redacción
As Noites de Música Antiga comezan este venres 14 de xullo na igrexa do Convento de Santa Clara.
O ciclo, no seu décimo cuarta edición, contempla dúas actuacións musicais. A primeira será a cargo de Resonet este venres 14 a partir das 20.00 horas.
Resonet é unha agrupación formada en 1990 en Santiago de Compostela, polo laudista Fernando Reyes e a soprano Mercedes Hernández. O nome da agrupación garda referencias a unha peza do Códice Calixtino.
Os seus compoñentes realizaron numerosos concertos en prestigisios festivais e auditorios de Europa. Actualmente está integrado por Mercedes Hernández, Christian Losada, Paulo González e Fernando Reyes e no seu repertorio aténdese especialmente a Galicia e ao Camiño de Santiago.
O programa da súa actuación divídese en cinco partes con temas desde o século XII ata o século XVII, con pezas de Claudio Monteverdi, Henry Purcell e Barbara Strozzi, entre outros.
O venres 28 celebrarase o concerto de Ars Novas no mesmo escenario e tamén ás 20.00 horas.
O acceso é libre ata completar a capacidade do recinto.