Marlene Armentero Cutiño é profesora de música e cantante. Naceu na Habana e reside en Pontevedra. Na súa faceta artística trae ao 'Cara a cara' un proxecto musical titulado 'Con nome propio'.
É un traballo musical baseado en poemas propios, aínda que tamén inclúe algunhas composicións doutros autores. "Teñen como temática as miñas vivencias como muller, como artista, como emigrante", explica. En canto ao son é unha fusión de "música cubana, galega, pop, americana. Un pouco de todo".
En plataformas dixitais pódense escoitar xa algúns temas e a súa intención é levalo a formato de directo. Con ela están Rafa Morales ao baixo e nos arranxos; Noli Torres na batería; Miguel Ponce ao saxofón e Iria Iglesias ao piano. Sinala neste programa de PontevedraViva Radio que é un directo que pode escoitalo público de calquera idade.
Preguntámoslle tamén pola súa faceta docente na que publicou un libro didáctico: 'MIREDÓ' e que "combina a aprendizaxe de música a idades temperás con outras linguaxes. Foi pensado para esas idades, pero seguimos traballando coa discapacidade", apunta respecto diso.
Tamén facemos referencia á etapa na que estivo como directora da Coral Polifónica de Pontevedra: "lémbroo como algo moi chulo, fixemos un traballo moi intenso. Para o meu foi un luxo traballar con eles e poder facer unha música tan potente como a polifonía".