RADIO.- García Jambrina lembra aos heroes de Ponte Sampaio en 'Así en la guerra como en la paz'
Por Marisa Ciordia
'Así en la guerra como en la paz' transcorre no inverno de 1808 e 1809. Recrea o envío de tropas británicas á Península Ibérica para facer fronte ao exército de Napoleón durante a guerra da Independencia. O exército que desembarcou ás ordes do xeneral John Moore para facer fronte aos franceses e defender aos españois non chegou a entrar realmente en batalla, senón que se foi replegando ata a cidade da Coruña para embarcar de novo ás illas.
Un capítulo da historia que botando man tamén da ficción, relata unha muller en primeira persoa. Catherine Gallagher é a heroína principal desta novela. Ela é unha das mulleres que acompañan a aquel continxente militar.
Luís García Jambrina foi o primeiro sorprendido ao imbuírse nos relatos que ía atopando: "dediqueime a investigar como era posible que se permitise, tendo en cuenta mesmo que ás veces ían cos seus fillos pequenos, por que querían acompañalos, que labores facían. Elas eran un conxunto e a maioría non teñen nome sobre os testemuños que quedaron. Interesábame moito a mirada da muller".
Aquel periplo bélico resultou tráxico porque "estivo rodeado de circunstancias anómalas. O exército amigo que chegara a liberalos dos franceses convertíase no inimigo porque ía sementando o caos e a destrución ao seu paso". En canto á figura de John Moore - enterrado na cidade herculina -, "foi un heroe na Coruña pero durante o camiño non soubo controlar ás súas tropas nin lles deixou combater. Expúxose salvalas e resultaron morrendo máis que se se enfrontasen aos franceses".
A novela reflicte as penalidades daquela guerra, pero Jambrina tamén deixa patente unha homenaxe ao pobo, cultura e paisaxes galegos. Entre eles aos heroes de Ponte Sampaio polos que lle preguntamos neste podcast do 'Cara a cara' que se pode escoitar na ligazón que se adxunta e descargar na web de PontevedraViva Radio.