Música e poesía combinan no Pazo da Cultura con Alberto San Juan lembrando a Lorca
Por Cristina Saiz & Redacción
Pezas de jazz e son cubano, interpretadas por La Banda, e a voz do actor Alberto San Juan, encargado de recitar textos do autor granadino, compoñen 'Lorca en Nova York', a montaxe que este sábado acollía o auditorio do Pazo da Cultura de Pontevedra.
Ao longo dunha hora, o actor madrileño ofrece un emotivo percorrido escénico recreando a viaxe de Federico García Lorca desde Granada á urbe máis icónica do planeta para despois achegarse á Habana.
Durante o proceso, San Juan pon voz aos sentimentos do autor de 'Poeta en Nova York', que a principios dos anos 30, xa ofrecía unha visión da realidade que permanece indeleble con reflexións sobre o capitalismo e o sufrimento das persoas que viven oprimidas.
'La Banda' formada por Claudio de Casas á guitarra; Pablo Navarro ao contrabaixo; e Gabriel Marijuán á batería, permitía recrear eses escenarios do gran autor da xeración do 27 e provocando o entusiasmo do público.