'O lar das palabras', un obradoiro familiar para fomentar o galego, celebrará o Día das Bibliotecas en Cambados
Por Anxo Lourido
O Concello de Cambados, a través da concellaría de Cultura e Normalización Lingüística, celebrará o Día das Bibliotecas cunha actividade destinada a público familiar. A cita está prevista para o sábado 22 de outubro a partir das 12.00 horas na Biblioteca Municipal Luís Rei de Cambados cun obradoiro denominado 'O lar das palabras'.
Trátase dunha proposta que comeza coa narración dun conto e, a partir dese momento, realizarase un percorrido de palabras entre a público sensibilización aos asistentes sobre a necesidade de conservar e manter viva a lingua galega. Desta forma, cada familia participante realizará o seu propio dicionario coa intención de reforzar o vínculo afectivo da familia co idioma.
A proposta está destinada a familias con escolares de idades comprendidas entre 3 e 8 anos. O público máximo para a sesión, que dura unha hora, é de 25 persoas entre adultos e menores. Este taller forma parte do TeCe Redes en galego, dentro do Fondo de Proxectos Xacobeo 2021-2022 da Xunta de Galicia.
A iniciativa é gratuíta pero é preciso apuntarse na propia biblioteca Luís Rei, chamando ao teléfono 986.520.008, ou a través do correo electrónico biblioteca@cambados.es.